中環出更：體諒長期病患老友記 趙傑文容許彈性上班
正所謂「健康就是財富」，無病無痛嘅打工仔女，就係發揮生產力嘅先決條件，然而作為僱主嘅傑出青年協會主席趙傑文，所僱用嘅員工好多都患上唔同症狀嘅長期病，但佢話只要協調得好，長期病患嘅員工亦都可以發揮所長。
協助長期病患者組織「再生會」日前搞會慶活動，與會嘅趙傑文話長期病患嘅範圍可以好廣闊，如高血壓同糖尿病都可以困擾至人生嘅盡頭，而隨着年齡增長，身體機能退化，好多人或遲或早都會成為長期病患嘅一分子，因此大家務必要對長期病患者多加包容同體諒。
佢作為長者就業嘅社企經營者，所聘用嘅老友記當中，部分就罹患腰痛、糖尿病或紅斑狼瘡等長期病患，所以佢容許有病歷嘅老友記員工彈性上班，方便騰出覆診同睇醫生嘅時間。佢又話儘管經營社企唔能夠擺脫商業原則，無可避免係有「跑數」嘅壓力，但有關業績嘅嘢就留畀較年輕嘅管理層負責，老友記員工就可以喺較為輕鬆嘅環境下工作。
周榮富：精神壓力影響病情
轉頭見到再生會主席周榮富、副主席張文舜同秘書長丁向群。周榮富話遺傳、生活習慣或意外後遺症等同長期病患有關嘅成因唔同，但精神壓力同起居作息亦往往會左右病情。佢又話以中醫角度，倘若長期熬夜、睡眠不足或飽受工作壓力，都會損傷正氣，容易造成「肝鬱氣滯」，影響肝嘅疏泄同免疫功能，不利健康，惡化病情，雖然長期病難以根治，但只要注意飲食、保持良好起居作息與愉快心境，病況就得以延緩。
出席活動嘅仲有食物及衞生局前局長高永文、安老事務委員會前主席梁智鴻、勞工及福利局副局長徐英偉同傑出青年協會前主席甄韋喬。甄韋喬話再生會鼓勵長期病患者逆境自強，其積極同正面嘅主張深得傑青會認同，相信兩個組織會繼續合作同互相支持咁話。
卓妮