中環出更：反修例被鬧漢奸走狗 郭榮鏗收五億陰司紙
民主派嘅立法會議員為力阻政府修訂《逃犯條例》多次搗亂議會，反對陣營嘅法律界議員郭榮鏗（Dennis）近日就收到一封內附陰司紙、用簡體字寫嘅信件，封信內容就係話Dennis「既做漢奸，又做走狗」，又話佢「逃犯條例事件中你很出力」，值得「獎利（勵）」，所以依家就「獎一筆獎金」畀佢喇！
Dennis尋日下晝喺社交網上載咗一張照片，照片中係一封夾附咗五張陰司紙嘅信件。佢仲留言話收到「五億」，又指「元朗天橋都十七億啦」、「五億做得啲咩」，仲笑言要向立法會秘書處申報。咁有冇報警？Dennis就話唔會報警嘞！
前年過年都收過
不過，今次已經唔係Dennis第一次收到有陰司紙嘅信件喇，前年佢就喺新年流流收到陰司紙，當中仲有夾附信件鬧佢「格衰、樣衰」，又祝佢「新年一路走好」。而佢嘅黨友、立法會議員楊岳橋同陳淑莊亦都曾經收過有陰司紙嘅信，真係大吉利是喇！
卓妮