政情：畢東尼地區辦事處 竟變睇相檔口
做得區議員通常都要周身刀，又識通渠又識換鎖，就係為咗幫班街坊解決吓啲疑難雜症，但原來地區辦事處都可以變成睇相檔口，事關會有街坊走去觀塘區議員畢東尼（Anthony）嘅地區辦事處睇相。但唔係由Anthony去負責睇相，而係由佢嘅其中一個地區辦事處職員李軍澤去睇。
有街坊搵職員幫孫改名
咪睇李軍澤個樣年紀細，就以為佢睇相時會亂噏，原來佢嘅來頭唔小，本身係玄學世家出身，風水、命理、面相、術數佢都識。佢就話好多時喺地辦都會透過面相，再了解吓街坊有乜嘢疑難咁，有時仲會贈吓啲街坊一兩句添！唔止咁，佢仲透露，話試過有個熟啲嘅街坊搵佢幫個孫改名。
講開又講，到底李軍澤係咪只同街坊睇相呢？佢就話曾經都有贈過吓Anthony幾句，但就唔肯講內容喇！話時話，Anthony本身係葡萄牙籍，而且又係天主教徒，風水命理依啲嘢，唔知佢又會唔會信呢？抑或只係純粹作為參考呢？