政情：李華明緊纏議員枷鎖 被踩唔敢出聲

驚被人拍片擺上網唱衰

李華明冇做議員後自己創業，近年仲粉墨登場拍電視廣告推銷牛筋丸、芝士腸等，人氣可能仲勁過做議員嗰陣。不過亦都因為咁而令佢有「包袱」，佢話試過同太太搭飛機時，畀空姐踩都唔敢出聲，空姐仲要踩完一次又一次添！但佢都唔敢出聲，話驚一投訴，就有人拍片擺上網，「到時就畀人鬧呢個前議員點點點」咁話。

租屋都要自費翻新單位

其實，佢敢怒不敢言嘅點止係被人踩吖，仲曾經因為租屋發生小風波添！話說佢同家人購入將軍澳物業前，一直都係租樓住，租約期滿，就打算住番自己嘅物業，點知租屋嘅業主要求喺交還單位前，佢要自費翻新番租用單位，雖然要花一筆錢，但因為唔想被業主唱衰，惟有硬食。

佢又話搬入新屋前因為要裝修，本想續租多一排，但業主要求續租期間允許帶人上佢個單位睇樓，由於仲住緊又點可以隨隨便便被陌生人上嚟睇樓呢？結果佢同業主都係傾唔掂，惟有租住酒店，仲搵咗個倉擺住啲物品先。

到後來終於搬入自己層樓嘞，又因為內地訂造嘅傢俬含有甲醛，搞到太太眼睛發炎，搞到佢又要搵除甲醛公司幫手，又再搬入酒店住兩星期。真係搬一次屋都一波三折喇！

好多人爭崩頭都想做議員，但一出咗名後，咁就成世都會被人望住，一發生啲乜嘢事，無論自己係啱定錯，都好易被人公審，隨時壞處多過好處，真係諗清楚至好呀！