中環出更：輸卵管生水囊 林琳月中入院割
唔少女士都有經痛之苦，好多時都以為冇乜事，其實隨時係患上婦科病。荃灣區議員林琳近日講起，自己因為經痛問題睇醫生，點知發現一邊輸卵管有十厘米水囊，即係有拳頭咁大，預約咗月中做手術割咗佢，醫生話手術後要住院幾日，之後要再休息三星期添！認真大件事！
唔影響日後懷孕機會
林琳話以往一直受經痛問題困擾，有時喺區議會開會，都痛到伏喺枱上，最近痛到頂唔順，終於去咗睇醫生，點知醫生懷疑佢輸卵管有個大水囊，佢急急去醫院做詳細檢查，證實真係有，醫生建議佢要做手術割咗個水囊。佢舊年年底結咗婚，呢個手術會唔會影響生育呢？好彩醫生話，佢做完手術後，應該唔會影響日後懷孕嘅機會。
不過，佢依家讀緊書，又要開區議會嘅會議，擔心手術後要休息咁耐，會嚴重影響上堂同降低區議會各會議嘅出席率，夾咗好耐日期後，終於決定月中做手術，咁樣嘅影響最細，但做完手術後就暫時出席唔到活動嘞！婦科病可大可小，佢奉勸各位女士，唔好以為係經痛好正常，一定要檢查清楚咁話。
卓妮