中環出更：馬逢國戴新眼鏡放膽頂頭槌
踢足球除咗靠對腳，對眼都好重要。立法會足球隊尋日喺元朗大球場同九龍地域校長聯會（聯會）踢咗場友誼波。體育、演藝、文化及出版界議員馬逢國，就戴咗副保護性十足嘅新眼鏡上陣。佢話自己大近視，唔戴眼鏡就連個波喺邊都睇唔到，但戴咗眼鏡就要慎防畀個波「省中」之餘又唔敢頂頭槌，而呢副新眼鏡就可以令佢放膽發揮球技。
馬逢國話以前試過眼鏡碎裂𠝹傷眼眉，所以會小心選擇眼鏡去做運動。而佢由小學二年班開始就戴眼鏡，曾經有成千度近視，後來上咗年紀，老花抵銷咗部分近視度數，亦因為呢個緣故，大概每隔兩年就要配新眼鏡以符合視力嘅變動。講到副新眼鏡，佢舊年喺廣州一個眼鏡城選購，仲一口氣配咗六至七副眼鏡，埋單計數只係同香港配一副眼鏡嘅價錢相若，而眼鏡做好之後就速遞到港，既廉宜又方便。
陸頌雄讀報紙標題驗眼
要戴眼鏡落場踢波嘅議員仲有陸頌雄。佢憶述學生時代，某日覺得視力模糊，而爸爸就叫佢讀出報紙體育版上嘅標題嚟測試視力，於是佢就讀出精工對南華嘅賽果，同標題完全脗合，於是大家都以為佢視力正常，其實佢只係讀出喺其他渠道得知嘅賽果，就係咁拖咗兩年先發現有近視。
講番呢場足球友誼賽，最終係立法會足球隊以三比二勝出。主持開球禮嘅聯會主席張漪薇所任教嘅小學都有組織學生參與足球賽事。由於佢嘅學生以少數族裔為主，當中信奉伊斯蘭教嘅女同學，儘管可以着短袖球衣，都要戴頭巾同着長褲，雖然感覺會較熱，但佢發覺少數族裔學生耐熱同耐冷嘅程度都較高，可能同佢哋多數來自基層家庭，較少開冷暖設施有關。
卓妮