政情：今日你上鏡：河內食眼鏡蛇宴 劉黃寧達：似食鰻魚雞肉
相信唔少人都食過蛇宴，但有冇食過眼鏡蛇呢？珠寶設計師劉黃寧達（Leta）早前就品嘗過眼鏡蛇宴。
話說Leta早前去咗馬來西亞，同喺當地住嘅奶奶慶祝九十一歲生日，之後就一齊去越南河內玩幾日，經當地酒店相熟嘅經理介紹，大夥兒去食全蛇宴，去到嗰間飯店就發現嗰度養咗好多唔同品種嘅蛇，而佢哋就試咗眼鏡蛇。
全蛇宴係點嘅呢？Leta話喺香港間唔中都有食蛇，但喺河內嘅蛇宴，勢估唔到連皮、內臟甚至係蛇骨都可以做出唔同嘅菜色。
未食之前，佢本來都有啲驚驚哋，事關始終係毒蛇，但最後都豁出去。咁眼鏡蛇嘅味道如何？佢話似食緊鰻魚，又似食緊雞肉喎。