有團體尋日公布調查結果，逾半受訪者指喺政府免費優質幼稚園教育計劃落實後，教學同行政工作量大幅增加，不單止工作時數多，而薪酬亦未能反映其學歷及年資，同工作量不成正比兼且壓力大，好多人想轉行。雖然幼稚園學生嘅學費有資助可減輕家長嘅負擔，但教育局局長楊潤雄唔通就對幼師嘅困境無動於衷？若果搞到幼師都爆煲，兼且鬧幼師荒，到時楊潤雄先諗計解決就太遲嘞！
