政情：今日你上鏡：單車迷林正財 過界學打拳踩
身兼行政會議成員嘅安老事務委員會主席林正財本身係單車迷，每星期至少要踩二百公里，近日見佢出席活動時就唔係踩單車，而係試玩拳擊，仲拳拳有力添，唔通佢打拳時諗住仇人嚟打？
林正財否認自己諗住仇人嚟打拳，仲笑笑口話「我都冇仇人」，可能因為做開運動，所以出拳比較有力。佢仲話，本身冇玩開拳擊，只有踩單車，不過平時睇開電影，見到啲拳擊運動就覺得係好好嘅體能訓練，今次試玩之後，都有啲興趣去學。之不過佢平時工作咁忙，而且仲要踩單車，會唔會冇時間學拳擊o架？佢就話做運動係愈忙就愈要做喎，所以唔會冇時間學喇。