政情：工總總裁 唔再係前高官 將由老少聰接任
城中各大商會同機構都鍾意前高官出任要職，貪佢哋夠熟政策同政府內部嘅運作，做起事上嚟都方便啲。香港工業總會（工總）亦唔例外，過往搵過最少兩個前高官做總裁，不過，工總嘅新總裁並非前高官，工總尋日公布，做過生產力促進局副總裁嘅老少聰，由下月一日起，將會出任工總總裁。唔知管理風格會唔會有唔同呢？
工總以往搵過曾任商務及經濟發展局副秘書長嘅蘇家碧（Linda）做總裁，Linda後來被港鐵高薪挖角後，工總又搵咗做過律政司政務專員、政制及內地事務局副秘書長嘅何健華，出任總裁一職。二人嘅任期加埋，都足足有成六年幾o架。
工總尋日宣布何健華將會離任，新總裁係老少聰，老少聰曾服務生產力促進局二十年，係資深專業人士，曾經為上市公司、政府部門、非政府機構等提供服務。告別前高官管理嘅時代，唔知工總未來會唔會改變好多呢？