政情：李梓敬法律博士畢業 讀得輕鬆全靠住得近
好多人工作一段時間後，都會想進修吓、增值吓自己。深水埗區議員李梓敬近日講起，自己讀城大嘅法律博士課程，已經考完最後一個試，估計都夠分數入讀法律專業證書（PCLL），整個課程都比佢想像中輕鬆，其中一個原因就係學校同佢屋企夠近喎！咁都關事？
多得家人幫手湊小朋友
李梓敬話，城大同佢屋企好近，所以多啲時間溫書，而過往做開地區工作時，都要處理同法律有關嘅議題，加上都有啲依賴考試技巧，所以課程比想像中輕鬆少少，雖然都想考律師牌，但就未決定今年定下年讀PCLL嘞，亦未決定第日要做大律師定事務律師。
佢又話，未讀前，都擔心過已經冇讀書十年，到底仲讀唔讀到，又擔心會唔會兼顧唔到家庭、工作以及讀書，依家讀完呢個課程，真係要多謝老婆同爸爸媽媽，幫手睇住小朋友咁話。