政情：多名常秘瀕退休 羅智光被轟無挽留
政府鬧人才荒唔係今時今日嘅事，呢個情況似乎有蔓延趨勢，事關即將有唔少常任秘書長到達退休年齡，資歷淺、未過試用期嘅辭職者又有唔少，加上整體公務員都有流失情況，但政府又好似懶懶閒咁，立法會公務員及資助機構員工事務委員會尋日開會，唔少議員都當面「捽」公務員事務局局長羅智光點解決，好似做過政府高官嘅行政會議成員兼立法會議員葉劉淑儀就問羅智光到底有冇挽留過常秘，而工聯會議員郭偉強就批評政府冇積極挽留人才，搞到好似「皇帝唔急太監急」咁。點知羅智光就淨係話公務員退休前，就會安排同事接任。即係答完等如冇答，好似睇唔到依家嘅情況咁，如果一貫做法有用，啲議員就唔會咁勞氣啦！
郭偉強批評畀唔到實際措施
有關委員會尋日其中一個議程係討論公務員編制、退休、辭職等情況，葉劉本身係政務主任出身，佢講到聽聞未來幾年有四名常秘退休，直言常秘作為政策局嘅骨幹，一次過有多名常秘流失對政府影響好大，因為部分政策局嘅局長同副局長資歷較淺，開到聲問當局有冇作出挽留，甚至獻計問到會否將舊制公務員嘅退休年齡延長。
議員亦關注到公務員流失情況，曾任政治助理嘅議員陳凱欣就話，公務員辭職數字比十年前嘅比例已經倍升，自己過去同公務員共事，發現唔少年輕政務主任離職，部分原因係考慮到婚姻同家庭，政府應該要有家庭友善政策。郭偉強就直指「皇帝唔急太監急」，議員想減輕公務員壓力，減少公務員缺額，但當局每年只係提供冷冰冰嘅數字，畀唔到實際措施去挽留人才，認為當局起碼要深入啲咁睇吓公務員流向私人市場嘅因素。
潘兆平指應為流失率訂水平
多名勞工界議員就講起私人市場嘅吸引情況，何啟明話，不接受公務員聘任比率為一成四，辭職嘅公務員中亦有六成未過試用期，反映出私人市場嘅條件拍得上公務員，公務員唔再係比較好嘅飯碗。議員潘兆平就話聞說依家連政府司機都同私人市場「爭崩頭」，話當局應該要訂個水平，如果流失率到一定程度，就要立即採取應對措施。
不過，羅智光就只係回應話，晉升委員會喺公務員退休前幾年，就會開始搵接任人，而未來一至兩年都有幾位常秘退休，當局已經安排適合同事接任，退休公務員嘅數字可以預計，所以接任同聘任安排都可以及早估算及鋪排喎。聽佢個講法，好似塞到個人落個職位就得咁！講真嗰句，接任係一回事，勝任又係另一回事，如果真係做得掂，政府就唔會成日出事啦，不如老老實實考慮吓，點樣換個方法，留住有經驗嘅同事啦！