政情：嫌肌肉唔平均 何俊賢做運動操胸減肚
男人通常對自己身材要求唔高，立法會漁農界議員何俊賢早排喺立法會路過，有個肚腩仔出現，格外顯眼，但佢卻講起介意自己個胸，話胸肌唔夠力，由細到大做掌上壓都做唔得多，做廿幾下已經覺得攰要抖一陣先，話要練吓胸肌同減肚腩喎！
何俊賢話，最近肥咗十磅，依家大約一百九十磅，但以佢咁高，就算有日去到二百磅都唔算太差，以前一百八十磅時打籃球，體重仲有點偏低添，不過就嫌自己唔夠平均，下半身肌肉要多啲，胸肌又唔夠力，依家好努力成日搵啲同事朋友一齊去做運動。
最大困難係時間唔夠
雖然都自知要做運動解決，但佢話，最大困難係時間唔夠，要去立法會開會之外，夜晚又要做業界嘢，有時要去大埔、香港仔、長洲等地，仲要返內地添，聽落認真忙呀。