政情：黃梓謙唔熟書惡補平機會資料

平機會新成員喺今個月二十日上任，Gary日前喺Facebook貼文，話喺過去幾星期翻閱平機會嘅研究報告同公開文件，為今個月上任做基礎準備，而喺五一勞動節之前，佢仲收到平機會嘅同事送咗啲文件同資料畀佢，等佢有更充裕嘅時間喺假日細讀。換言之，佢喺假期都冇得出街，要喺屋企「溫書」嘞！

會敦促政府跟進歧視條例

佢又自認唔熟書，話平等機會政策課題廣闊，喺以前未能一一涉獵，但未來佢會認真聆聽同學習，擴闊同社會大眾嘅接觸面，盡最大努力協助平機會落實策略目標，特別係敦促政府跟進《歧視條例檢討》嘅建議喎。

老實講，平機會劣評如潮，唔單止多名前主席曾爆出醜聞，亦曾被狠批大花筒同退休高官俱樂部等等，有立法會議員更直指平機會年花一億八千萬公帑，但服務效率低，依家平機會主席換咗人，連帶Gary等新委員，係咪可以扭轉局面，大家就要拭目以待嘞！