政情：蔡宗富玩新物料 推藍寶石鐘錶
唔少鐘錶界都呻生意難做，但做手錶出口同零售生意嘅香港鐘表業總會副主席蔡宗富（Daniel）就話旗下業務都算平穩，如果喺設計同物料方面推陳出新，仲會有驚喜添！
Daniel話依家年輕人對腕錶嘅追求係款式要夠潮同埋有品牌故事，唔係圓就係方嘅傳統錶好難吸引佢哋注意。幾年前，佢得到一個有過百年歷史嘅意大利運動品牌授權銷售手錶，設計團隊曾經設計咗一款望落唔圓又唔方，仲要有切角嘅錶，佢仲話：「咁樣點得o架？」但估唔到勁賣得喎。
同瑞士合作做年輕人品牌
Daniel嘅設計團隊喺香港同瑞士，仲同瑞士合作做一個針對年輕人嘅品牌，其經典設計同樣玩味十足。佢話依家做錶呢行，一係玩機芯，一係玩物料，但係玩機芯需要好高技術，唔係個個玩得起，所以佢就玩新物料。最近出咗碳纖維同埋藍寶石水晶（Sapphire），市場反應好好。尤其係屬於人工合成物嘅藍寶石水晶，其硬度同折射率接近鑽石，而且全球只係得幾間品牌有推出，難怪咁受歡迎喇！