政情：唔開冷氣風扇瞓 龍子明心靜自然涼
夏天仲未到，高溫天氣已屢破紀錄。早前香港樹仁大學舉辦頒獎禮時，當日氣溫高達攝氏三十一度，破晒紀錄，校董龍子明卻依舊西裝骨骨咁「全副武裝」現身撐場。問佢係咪有法寶解暑？佢拋出一句：「心靜自然涼」。
笑言最大益處係電費平
講得咁禪，真係唔怕熱？龍子明就自爆，夏天喺屋企唔會開冷氣，臨瞓前開一陣風扇，到瞓覺時一定要熄咗佢，否則太太會覺得凍喎。佢又話，平時甚少煲湯水消暑，只係鍾意飲水，就算帶學生團去內地，去熱到好似火爐嘅地方，依然可以着得到成套西裝。見佢身形咁有「分量」，真係估唔到佢咁「耐熱」。佢仲笑笑口話，耐熱最大好處係電費好平咁話。