政情：象哥變招 新田購物城 轉街市救亡

新田購物城坐落於落馬洲邊境地帶，由於交通不便嘅關係，唔好話分流，連想搵多個旅行團去都難。政府曾經想將逼爆土瓜灣嘅遊客分流去購物城，但係睇嚟仍欠缺吸引力。唔少購物城商戶都大嘆生意冷清，搞到蝕晒大本，所以索性拉閘唔做生意，或者等假期先開門做生意，有啲就話免租期過後就會即刻走人。不過有商戶早前就收到律師信，話今個月起就要收番租金，又話商戶違反合約佔用舖位，要即刻開門營業同埋交番晒過去一年幾嘅租金，如果唔係就要喺月底前執包袱走人，引起好大反彈。

象哥尋日就話，好多商戶喺「免舖租，無成本」嘅情況下，從未做過生意，或者係長期「拉大閘」，覺得佢哋咁做係蹉跎歲月，仲話「旅行團嚟到，冇嘢賣，冇嘢睇，領隊真係會怪責我哋」。佢又承認，購物城發展唔算成功，所以決定轉型做菜市場救亡，依家已經密鑼緊鼓咁同內地一間供港漁農供應商洽談緊，唔止一間供應商有興趣咁話喎！

辦漁農展銷會試水溫

佢話，現時傾得差唔多，但申請牌照方面就比較複雜，唔係一時三刻就搞掂，預計事成之後會做漁農展銷會試試水溫。象哥似乎都幾有信心咁，覺得供應商可以帶嚟基本客源，之後人流自自然就會多o架啦。以佢所知，大部分食肆都會繼續營業，仲話菜市場真係搞得成嘅話，遊客買完魚、肉可以交畀食肆加工處理，有得做咁話。吓？唔通轉型做街市都係針對內地客？

象哥又話，唔會趕絕一啲肯交租留低嘅品牌直銷商戶，佢哋到時都可以同「菜市場」並存。睇嚟呢個購物城到時真係應有盡有，不過都要有人肯嚟先得呢？象哥就話唔使擔心，佢都諗咗其他方案應對，但就想賣個關子，暫時唔方便透露喎！