政情：過氣港督遺留法律漏洞 肥彭冇資格講逃犯例

違法佔中案中，佔中發起人戴耀廷等九名被告於本月九日被法庭裁定罪名成立，肥彭就批評當局以過時法例提出檢控，裁決令社會分裂。當時社會各界已批評肥彭廢噏兼豬噏，人都唔喺香港，講乜都唔靈。最近立法會因《逃犯條例》修訂鬧得熱烘烘，民主派更加喺相關法案委員會玩嘢拉布。而肥彭就喺尋日刊登嘅一個訪問中話，修例直接打擊一國兩制原則，令外界難以相信北京會信守承諾，更難以信任香港會同內地其他城市有別，享有唔同待遇。

佢又質疑，修例並非如港府所言嘅必須用作堵塞法律漏洞，認為相關修訂建議將破壞香港嘅地位、穩定及治安，對營商者構成恐懼。佢仲話，一個相信法治嘅社會與一個唔相信法治嘅社會，兩邊係唔會達成協議喎。

陳日君加把口批評

被指為「搞事四人幫」之一嘅天主教香港教區退休主教陳日君尋日亦參與「大合奏」話，《逃犯條例》最危險之處係內地只要聲稱有表面證據，港方就要將有關人士引渡到內地，又質疑修例涉及複雜問題，只有二十日諮詢期係唔夠。英國保守黨人權委員會副主席、香港監察主席羅哲斯亦都拍片批評修例，仲話修例係將綁架合法嘅法例，如果通過就將會經合法程序誘拐同綁架社運人士，而商界等各界人士都會陷入危險。

陳雲生怒斥添煩亂

不過，時事評論員陳雲生就反駁，批評肥彭同香港已經冇咗關係超過廿一年，已經係過晒氣，而香港事務同英國已完全冇關係，肥彭作為舊官員去評論現時香港事務係「唔應該亦唔合適」，鬧爆肥彭喺度挑撥是非、添煩添亂。陳又話，香港由英國管治時，英國人都冇處理到移交逃犯問題，依家港府嚟堵塞法律漏洞，肥彭係冇資格指指點點，仲直斥肥彭「管治時冇做過嘢，今日就唔應該說三道四。」陳認為，商界等人士只要奉公守法，根本就唔使憂慮，除非身有屎啫！