政情：慈善跑太多 黃偉鴻借卡通吸睛
近年愈來愈多機構主辦慈善跑，一來可以鼓勵市民做運動，二來可以做善事。中華廠商聯合會會董黃偉鴻（Ellis）最近喺大埔舉行咗第二屆慈善跑，共有三千人參加，人數比第一屆多近兩倍，籌得嘅善款亦倍增。雖然成績唔錯，但係佢就呻話搞慈善跑愈來愈唔容易。
點解呢？Ellis話，因為最難係要吸引市民報名參加，但依家有太多呢類活動。記得兩年前舉辦第一屆時，佢喺公司社交網站接受報名，用咗半年時間先得幾百人參加，今屆佢就諗到用一個日本知名零食品牌卡通人物做主題，一樣只係喺自家社交網站宣傳，但係市民反應好熱烈，兩個月就吸引到三千人報名，仲要提早截龍添！
搵有救傷資格義工幫手
舉辦長跑活動難免有意外，要搵夠義工幫手係另一個難題。Ellis話今次都有百幾個義工幫手，仲要具備救傷資格，所以都唔容易。今次籌得善款分別捐畀仁濟醫院同香港福建希望工程基金會，後者仲講明用於支援香港本地貧困學生，希望起到拋磚引玉作用。