肥瘦漢扮煲煙 圖劫夜歸漢
【本報訊】兩漢扮「煲煙」圖劫夜歸男。昨凌晨零時許，姓譚（廿三歲）青年在旺角乘搭的士歸家，當抵達荔枝角寶輪街曼克頓山屋苑停車場外時，譚繳付車資後，挽着兩個手提紙袋擬落車。他左腳踏出車外時，兩名原本站在路旁「煲煙」的肥瘦漢，突然掟低煙頭，直撲向的士，其中戴口罩男衝向事主，企圖搶走其手錶及手鏈，同黨在車旁負責「睇水」。
兩匪掉頭走 的士難追截
據悉，譚奮力反抗，大叫：「做咩呀！做咩呀！」姓高的哥亦高聲喝止，賊人與事主一輪拉扯後，終見事敗與同黨朝深旺道逃跑。譚即時關上車門，向的哥要求：「可唔可以幫手追佢哋？」的哥踩油追截。豈料，賊人奔跑百米至深旺道，突停步轉身反方向「掉頭走」，的士因無法掉頭，無奈目送兩賊逃脫。
警方到場在附近兜截，但無發現賊蹤，初步調查後，不排除賊人在屋苑外扮「煲煙」，守候夜歸居民伺機搶劫。譚幸保財物不失，惟糾纏間頸部受傷需送院。
姓高的哥形容：「佢哋（兩名賊人）喺度食煙同傾偈，好似普通街坊，似啲夜青無碇去咁，所以都無為意。點知個客臀部都未離開張櫈，其中一個就走嚟搶嘢，另一個就企喺度等，佢哋由頭到尾都無講過嘢。」