政情：今日你上鏡：梁智鴻八十大壽 仔女扮壽桃送喜

有「金刀梁」之稱嘅前行政會議成員梁智鴻（右二），前日獲一班城中老友幫佢慶祝八十歲生日，仲將多張相放上社交網站。其中有一張係金刀梁同太太梁馮令儀（左二），同埋打扮得好有趣嘅兒子梁捷榮（左一）同大女梁捷華（右一），唔知扮緊乜嘢呢？梁太笑稱，兩名喺外地工作嘅仔女特登返港兩日參加壽宴，期間突然着上壽桃裝，加配廣東生日歌及舞步，為晚宴帶來驚喜。之後兩人又大派壽桃禮物畀所有賓客，氹到大家好開心。梁太仲話，呢個係個女嘅主意添！見金刀梁笑得咁燦爛，相信呢個生日派對實令佢好難忘喇！