中環出更：王賢訊全職做主席 預告獎勵太太持家

Vincci話，一早已同丈夫協調好，未來一年會好好照顧屋企，等佢專心做好善團主席。至於Vincent就訂立一連串工作大計，希望進一步發展義工隊，因為現時義工普遍年長啲，將來希望吸引新血，不過唔同慈善團體都爭緊義工人手，所以都要諗橋搶人喎。

李何芷韻笑言同細妹似樣

今屆董事會有唔少新面孔，保良局總理李何芷韻（Amanda）嘅妹妹何芷茵（Crystal）都加入做總理。Crystal話，姐夫李文斌都做過仁濟主席，所以加入仁濟係有淵源嘅，未來希望多啲關注教育議題，尤其係學生情緒同壓力問題。Amanda就過兩招畀個妹，叫佢要多花時間同心機，亦要多啲走入社區同人接觸。Amanda仲笑笑口自認同細妹太似樣，自己望住Crystal喺場刊嘅總理相，都以為係自己，亦有朋友恭喜佢做咗仁濟新總理添，認真搞笑。

香港菁英會副秘書長潘偉業都有現身，事關太太鄺晶晶都係新丁總理。佢話日後會幫輕太太嘅負擔，多照顧家庭，不過太太做事一向有系統，一早為仔女編好時間表，睇嚟跟足做就可以喎！

李何芷韻（中）同老公李文斌（左）現身支持何芷茵（右）。

鄺晶晶（中）係新丁總理，潘偉業（右）同名媛好友何倍倩（左）都好撐佢。

卓妮