政情：張仁良迷上歷史書 靠學生幫手買
有啲人覺得中國歷史讀起嚟好乏味，原來教育大學校長張仁良都曾經有咁嘅諗法。佢尋日擔任「陳靜中國歷史教學獎」嘅主禮嘉賓，就自爆學生時代對中史科欠缺學習動力，課堂上老師都係依書直說，又要死記硬背一大堆人物同年份來應付考試，覺得沉悶之餘成績都係相當勉強。
讚似武俠小說咁好睇
後來佢喺城大任教，某次偶然機會之下喺內地書店買咗一本以幽默風格嚟講述明朝歷史嘅書籍，呢本書就好似武俠小說咁引人入勝，令佢一改歷史係枯燥乏味嘅印象。由於嗰本書係有續集嘅，而當時網購尚未普及，佢要不時打聽續集嘅出版日期，亦要搵內地生幫忙，放假回鄉幫手買新書，陸陸續續集齊一套九冊。
佢話呢套書籍不但燃起佢對歷史嘅興趣，亦深感生動活潑嘅演繹方法，對歷史教學大有裨益，所以佢做咗教大校長之後，就同教大嘅製作團隊炮製一套看動漫學歷史系列，畀小學生更容易掌握中國歷史知識咁話。