政情：副局政助無影捱轟 陳智遠抽水踩多腳？

Fb留言「我selfie功力都唔弱」

舊粉嶺裁判法院活化為香港青年協會領袖學院，日前舉行開幕禮，已轉型做保護古蹟同帶古蹟導賞團嘅陳智遠，當然唔會錯過去實地睇吓，之後就喺社交網站Facebook留言同上載咗啲相。最後佢仲留言話「先排有議員『讚揚』副局政助自拍嘅能力好高。今日撞到常秘Cherry（民政事務局常任秘書長謝凌潔貞），我同佢講，其實前政助影selfie嘅功力都唔弱o架。有相為證。」

班副局長同政治助理捱轟後，都唔知點補鑊好，依家風頭火勢，陳智遠仲攞呢件事嚟開玩笑，係咪想火上加油呀？其實佢當年做政助，亦畀議員鬧過人工三級跳，但唔見影，唔知佢做過乜喎，依家咁講，難免令人質疑佢想踩多腳？