政情:收料站:鄉委會換屆 首現女鄉頭

廿七鄉鄉事委員會換屆選舉喺上月舉行,新選出嘅執委已喺尋日展開為期四年嘅任期,而鄉委會主席(鄉頭)會自動成為區議會當然議員,意味住九個新界區議會有唔少新人。

11鄉頭將成區會新面孔

今屆共有十一個鄉換咗新人做鄉頭,部分因為年事已高選擇退休,亦有部分爭取連任失敗。十一個鄉頭將會成為區議會新人,當中以離島同元朗區議會數目最多,各換咗三個新面孔,而沙田同屯門區議會就無任何變化。

其中打鼓嶺鄉委會早前破天荒選出女性陳月明出任鄉頭,而上月底進行嘅東涌鄉委會亦同樣選出新人黃秋萍做主席,成為第二個女鄉頭喇!

此外,現屆區議會嘅正副主席有唔少由當然議員擔任,當中荃灣、大埔同西貢區議會嘅正或副主席未有爭取連任,所以將要召開會議另選出正副主席人選。荃灣同大埔預料會喺月中開會選新主席,至於西貢就留待下月大會選副主席。

第一手消息請下載on.cc東網iPhone/iPad/Android/Windows Phone Apps