政情：八網難逃：向傷健運動員挑機 徐英偉15秒食20拳
近年唔少勞福政策出爐引嚟社會熱議，勞工及福利局副局長徐英偉（Caspar）經常喺立法會被議員炮轟，但近日就更疑似被立法會議員何啟明捉去打，Caspar連食幾拳頂唔順，開始大嗌兼還拖，可惜依然不敵對手。
體驗輪椅武術 對打變捱打
實情係何啟明日前出席共融盃活動後喺社交網站上載短片，Caspar親身體驗輪椅武術向傷健運動員「挑機」。坐喺輪椅上嘅Caspar開頭以右手擋拳，及後發現擋唔住大嗌「左手唔夠長（出拳）」，即時變陣以左手擋、右手打，旁觀者不停打氣叫「加油」，可惜對手出拳實在太快，Caspar搵唔到位入，喺短短十五秒內就被打近廿次。
鬼馬嘅何啟明喺貼文標籤「#係對打定係俾（畀）人打」，「#肯落場參與已經很好」，「#瞓身支持傷健共融」，似係樂見Caspar被打，亦可能係難得有官員咁唔錫身！