政情：何啟明立會大講「譚仔話」
早前「譚仔話」喺網絡上流行一時，當中用字其實跟香港講開嘅廣東話差唔多，但口音就相當唔同，所以香港人大多都聽得明，同時會覺得好有趣，立法會議員何啟明尋日亦都喺會議上大講「譚仔話」：「淆肉淆演而腐三牲、大辣早狗、渣個Pi蛋、凍茶少田、渣多個炸醬、仲有矛池它輸要呢先生？」唔知坐喺佢對面嘅局長到底聽唔聽得明呢？
落區聽得多 冇特登練
點解講起「譚仔話」？事緣當時辯論緊改革移民及入境政策議案，何就提到香港好多移民人口，佢哋提供咗好多勞動力，好似香港人經常幫襯嘅呢間米線店就係其中之一，所以好多香港人都聽過「譚仔話」。事後何話呢啲口音存在已久，只不過近年有人拎嚟講，所以逐漸演變成一種特色咁啫！
何仲笑自己講得唔夠純熟，話如果自己真係喺相關店舖工作，就肯定會畀人炒魷魚！至於發言前佢有冇特登練過，佢就話有時落區，例如去到街市都會聽到類似口音，所以唔使特登練都識講少少咁話。