內地團遊客逼爆九龍城都唔係一朝一夕嘅事，當區居民叫苦連天。香港旅遊業議會就構思將備受內地團歡迎嘅維港觀光船由九龍城碼頭分流至黃埔紅磡碼頭上落，紓緩逼爆九龍城問題。本身係黃埔東區議員嘅立法會議員梁美芬尋日喺立法會鬧爆政府冇事先諮詢，九龍西立法會議員黃碧雲亦都炮轟當局分流措施令「區區變災區」。好彩有關建議已擱置，否則當局同旅議會主席黃進達就有排畀人扭耳仔喇！
