政情：郭文浩入民主黨 埋肥尹堆
街坊工友服務處（街工）早前因解僱員工而引發風波，仲搞到爆發退會潮。其中被街工再次以財困為由遣散天水圍天晴團隊，該團隊嘅組織幹事郭文浩最近就加入咗民主黨（白鴿黨），做立法會新界西議員尹兆堅（肥尹）嘅地區辦事處議員助理。尹兆堅以前都係街工嘅成員，唔通郭文浩行番佢條舊路？
舊年畀街工炒魷
郭文浩喺舊年十一月被街工解僱，佢話之後都即刻搞退會，去到舊年十二月先正式退出。佢話一路有做兼職同埋以眾籌方式延續地區工作，不過就唔想再靠朋友「揼心口」支援，同埋因為屋企問題，所以先決定搵番全職工作。
至於郭文浩點解會加入白鴿黨？肥尹就話白鴿黨淨係得屯門有地區辦事處，而佢一路都有物色緊新界西嘅人士，覺得郭文浩同佢志同道合，所以就邀請佢入黨囉！佢仲話依家有郭文浩，就有人做番天水圍方面嘅地區工作嘞！