政情：黨友笑陸頌雄 內置自拍神棍
自從手機有得影相咁輕便，一班朋友外出都鍾意玩自拍，人數多起上嚟，仲會加多支「自拍神棍」，務求影晒咁多人。立法會議員陸頌雄（Michael）日前出席工聯會活動後，叫埋立法會議員麥美娟（Alice）及何啟明等黨友一齊自拍，Alice笑佢「內置自拍神棍」喎。內置？喺邊？
夠高大手長 點移動都得
其實係Michael生得高大，手又長，自拍唔使揸棍咁解啫！Michael就話，如果用普通手機自拍，佢可以影晒十個人，如果部機有廣角鏡，十幾廿人都冇問題喎。「內置自拍神棍」仲可以點移動都得，方便過買一支。Alice就話自己成日笑Michael同荃灣區議員葛兆源內置自拍神棍，最鍾意搵佢哋揸機，唔使網購買自拍棍啦！
何啟明就話其實犧牲咗Michael，因為揸機嗰個會影到個頭大啲。Michael就話唔會，睇番啲相，佢個頭又唔算極大，睇嚟佢隻手真係夠晒長。