政情：開會公然拆包裹區諾軒畀人捉到

轉枱底鬼祟解封二手書

話說尋日立法會一個委員會召開首次會議，選緊副主席時，區諾軒突然好開心咁拎住個包裹，努力嘗試拆開佢，主席郭偉強爆咗一句「出嚟拆喇」，就令到佢放番落枱底，好似學生哥做曳事被老師發現咗咁。不過佢想拆包裹嘅決心並無熄滅，密密喺枱底繼續拆，最終順利拆封。

事後問番佢，佢話係網購返嚟嘅幾本同政治學有關嘅二手書。佢向來少去實體書店，所以養成喺網上買舊書嘅習慣，價錢又平。佢仲話現時好多人放二手書，就連圖書館嘅舊書都有，今次呢幾本書就係圖書館舊書，連圖書館嘅標籤都仲未搣走添。