中環出更：鄧宣宏雁 籲僱主外傭互相體諒
香港現時有超過三十萬名外傭，幫忙打理家頭細務令夫婦安心外出工作，如果外傭患病，肯定令到僱主相當頭痛，早前有患癌外傭被僱主炒魷引起廣泛關注。卓妮日前喺沙田馬場同唔少名人講起呢個話題，保良局總理鄧宣宏雁（Emily）就話，社會上有僱主刻薄外傭，亦有外傭對長者或小朋友施虐嘅情況，所以雙方都應該本住人心肉造嘅心態，互相體諒。
Emily仲話，任何人患重病係講彩數，如果強制外傭來港前接受詳細身體檢查，反而會增加僱主成本，因為唔少僱主只係打工仔，家庭收入並非十分多，只係家庭有需要，不惜加重負擔都要請外傭啫。Emily丈夫鄧鉅明就話，好幸運所聘請嘅外傭冇試過出現嚴重身體問題，認為香港外傭數目龐大，總會有機會遇上不幸事件，作為僱主應該經常要有同理心。
吳傑莊偏好聘首來港外傭
當日入場嘅仲有愛沙尼亞共和國駐港名譽領事林建康夫婦、菁英會名譽主席吳傑莊等。講起同外傭嘅相處之道，吳傑莊就偏好聘請首次來港打工嘅外傭，貪可以自己一手一腳教導，仲會當佢哋係屋企人咁相處，咁就可以維持良好嘅僱傭關係。
轉頭見到立法會議員姚思榮、香港旅遊專業聯盟主席羅詠詩同旅遊事務副專員廖廣翔，佢哋特登同中港兩地嘅旅遊業界代表及內地旅客參觀馬場。姚思榮話，內地遊客對馬場有相當大興趣，認為可以將馬場放落旅客訪港行程中喎！
卓妮