政情：公民講場：水上的士遲來招標 進度難予厚望

政府一向做事慢幾拍，好像早前吐露港公路因為被反修例暴徒堵塞，令大埔頓變孤城，政府喺幾日後先至施施然安排免費渡輪疏導交通。不過，沒有最慢，只有更慢，好似「水上的士」概念就足足慢咗十八年，事關政府早喺二○○一年已提出，但議而不決，一路都冇影，直到尋日運輸及房屋局轄下運輸署終於宣布為「水上的士」航線招標，有區議員鬧爆政府效率低，依家只係遲到好過冇到。不過話時話，依家先開始招標，以政府進度，真係唔知市民或遊客幾時先可以搭到水上的士，希望運房局局長陳帆咪再慢吞吞喇！