中環出更：工記疑內訌 周聯僑爭位選立會
立法會三個勞工界功能界別議席，一向由工聯會（工記）同勞聯「二一分」。工記內部規定，兩個議席只可以做一屆，完成四年任期就要換新人上位。最近工記接受報名參加兩議席甄選，並且於今日截止，聽聞本身係副會長嘅建造業總工會理事長周聯僑都有報名，今屆佢已被勸退出戰九龍西，依家又報名爭位，唔通工記爆內訌？
周聯僑承認報咗名，因為建造業總工會早前開會，一致通過提名佢參加甄選。皆因業界近年面對唔少棘手問題，包括工程撥款遇到拉布，數以千計工人面臨失業，仲有標準工時、取消強積金對沖機制等都相當急切。
吳秋北斷言唔報名
佢又話，近年議會內唔少激進派議員都大大聲，甚至爆粗、掟杯，有工友覺得現任勞工界議員太斯文，言下之意，似乎對郭偉強同鄧家彪有啲意見。
周聯僑又話，曾鼓勵理事長吳秋北一齊報名角逐出線，因為對方近年活躍於勞工界同政界議題，相信做埋立法會議員，會令仕途更完整。我哋問過吳秋北，佢就斷言唔會參加甄選。
卓妮