政情：應用程式推算空氣質素 黃錦星教人行健康路
成日行山嘅環境局局長黃錦星，唔止熟悉山路，連市區路都話好識揀，仲搵埋條好路畀你行添！佢喺網誌「星星話」分享，話部手機下載了「空氣質素健康指數」（簡稱AQHI）嘅流動應用程式，方便掌握「區區」空氣質素，亦下載咗香港科技大學推出嘅PRAISE-HK流動應用程式，得知「街街」實時推算嘅空氣質素訊息，透過兩者相輔相成，可選擇一條健康嘅路線。
指善用資訊係「乘足在空」
佢形容善用流動應用程式嘅空氣質素資訊係「乘足在空」，外地例如倫敦亦有，好讓騎乘單車、跑街同步行人士掌握有關地方嘅空氣質素，選擇出行路線圖。
另外，環保署同大學合作研發創新尖端微型傳感技術，結合無人機對遠洋船進行遙距實時監測污染物排放及燃料含硫量，以助識別船舶嘅違規情况。黃錦星日前首次做無人機「機師」，模擬遙控偵測器「天狼嗅探儀」以監察海上船舶排放。