政情：傳上位夢碎 王威信退黨 葉劉冇承諾過

立法會議員田北辰喺二○一七年退出新民黨，令到新民黨立法會議席頓時由三變二。葉劉當時就話必定派人參選，首要係培養新人接班，當時政圈普遍睇好，當屆立會選舉時排名單第二、未有隨田北辰退黨嘅王威信，最大機會喺二○二○年為新民黨披甲上陣收復失地，所以政圈有傳新民黨轉軚令王威信美夢落空，最終促成今次退黨。

未能滿足要求 和平分手

葉劉接受查詢時證實王威信退黨，話對方有抱負，提出退黨時表明志不在區議會，因為本身係律師嘅王威信，律師收入比擔任區議員薪酬多，直言王威信想要乜嘢大家都明，奈何新民黨未能滿足到對方，唔能夠作出承諾，所以大家都算係和平分手。

指王人緣欠佳 離開冇壞

葉劉仲講明從來無承諾過二○二○年立法會選舉會支持王威信出選新界西，因為新界西九席當中已有五名建制派議員，難以再容納多一名建制派，重申新民黨好合理同計過條數。至於未有重奪田北辰退黨嘅席位，葉劉就話因短期內見唔到呢區有空缺，新民黨長遠計劃應該要栽培人選，不過王威信唔退黨都唔會係首選，因為對方喺地區人緣唔好，而人緣則係選舉一項重要條件，所以毫不介意對方退黨。如果有其他政黨向王威信招手作出承諾，佢就祝福對方好運喇！

王威信上載田北辰合照

其實新民黨早喺舊年，內部已有聲音指唔應該派人出選下屆立法會新界西選舉，擔心欠缺基本實力下出選分薄建制派票源，反會令建制派議席減少。有新民黨成員相信，王威信未能出選明年立會選舉係佢唯一退黨嘅原因。

至於王威信嘅最新動向，地區盛傳將會加入經民聯，王威信接受查詢時證實退黨，但表明對其他事宜冇補充。而經民聯過往集中九龍西，目前只有四名屬新界西嘅區議會，立法會中則坐擁八席，但只有一席由地區直選產生，有冇實力將王威信送入立法會實屬未知。至於王威信早年獲委任為元朗區議會時為自由黨成員，但喺二○一三年退出轉投新民黨，今次係第二次退出政黨。

雖然唔知道王威信會唔會加入其他政黨，但咁啱得咁橋，佢尋日喺社交網站上載咗張相，就係佢同實政圓桌嘅田北辰合照，仲留言話「好耐無同舊老闆合照，希望唔好引起任何揣測」。