中環出更：鬧錯英國駐港總領事 陳勇道歉

話說陳勇尋日朝早會見傳媒時，前後用咗約三分鐘時間鬧爆「英國駐港總領事」最近嘅言論，認為應該向全港市民同全中國人民道歉。佢當時提到，英國歷任首相對香港一國兩制評價高，連蘇格蘭、愛爾蘭領袖都曾提出效法，聲稱作為「英國外交官」，應為自己國家更多貢獻。

翻查資料顯示，英國駐港總領事近期無公開評論香港事務，相反美國駐港總領事唐偉康就動作多多，先後接受傳媒訪問及出席活動致詞，聲言香港近年往往側重「一國」，輕視「兩制」，因此，外界合理懷疑陳勇係「張冠李戴」搞錯咗英國同美國，令到「英國駐港總領事」無端端中箭。

繼續追擊唐偉康

陳勇喺事件發生多個小時後終於認錯，確認英國駐港總領事並沒發表批評香港事務言論，佢為自己言論不當向對方表達真誠歉意，惟言猶在耳，佢依然繼續狙擊唐偉康，直指對方近期嘅言論引起好多香港市民不滿，促請對方向全中國人民致歉，唔知咁樣算唔算跌咗落地拎番啲沙呢？

卓妮