政情：顏汶羽怕糖尿 奶茶戒凍戒糖
社會各界日漸注重健康，政府都推動食嘢要少油少鹽少糖，觀塘區議員顏汶羽（Frankie）最近都開始戒糖，由習慣每日都飲凍奶茶，轉飲熱奶茶，而且唔加糖嘞！
堅持4個月 輕咗十幾磅
Frankie話每日有兩樣「必需品」，一係奶茶，二係橙，但因為橙冇得少甜，所以惟有喺奶茶着手，又話如果飲凍奶茶走甜，味道會變得好古怪，接受唔到，所以就索性改為飲熱奶茶唔加糖，至今已堅持咗約四個月。
查實Frankie決定改變習慣唔係單純跟隨近年嘅健康潮流，而係因為佢家人有糖尿病，佢都擔心過會唔會遺傳畀自己，加上佢工作繁忙，運動較少，所以就決定戒糖，但佢話其他飲食習慣就好難改，畢竟做議員好多時都要應酬，有時食得冇咁健康都冇辦法。
戒糖都有得着嘅，事關佢只係改變飲奶茶嘅習慣就已經輕咗十幾磅，感覺啲衫鬆身咗，成個人都fit咗喎。