政情：建制派怕勞資分裂浮面 鄭泳舜冷手執個熱煎堆
法定最低工資擬上調至三十七元五角，並喺今年五月一日生效。立法會一個審議最低工資修例嘅小組委員尋日首次開會，民建聯（民記）鄭泳舜（Vincent）喺零競爭下當選主席。在場嘅勞工界同商界竟然零競爭，畀Vincent咁輕易「冷手執個熱煎堆」，原來係怕分裂浮面！
梁耀忠耍手拒做委員會主席
《2019年最低工資條例（修訂附表3）公告》及《2019年僱傭條例（修訂附表9）公告》小組委員會尋日開會，由席上最資深議員梁耀忠（阿忠）主持選主席，未幾民記漁農界何俊賢就提名由Vincent做主席，勞工界同商界都話好，之後有議員手指指想再叫阿忠做，阿忠又慣常地耍手擰頭。公民黨郭家麒就話提名飲食界張宇人做主席，張拒絕兼開宗明義話「（最低工資）改做廿蚊個鐘我就做」，郭就笑「咁變做廿蚊張委員會嘞」。
據了解，建制派唔想將個委員會變成階級鬥爭，若勞工界或商界坐上去都驚畀人覺得偏頗，市民唔會聽晒全個會議，擔心有乜嘢閃失變內耗，反而Vincent似係中間派就比較適合。