政情:施麗珊邀約楊岳橋 再辯單程證

公民黨(公文袋)黨魁楊岳橋喺今年情人節正日,同香港社區組織協會幹事施麗珊有一個電台約會,兩人透過大氣電波激辯單程證問題。據了解,當日施麗珊兜口兜面向楊岳橋發「英雄帖」,邀請會面討論單程證,而楊已經決定偕同黨友赴會,閉門再戰!

上月楊岳橋擬提無約束力動議討論檢討單程證時,竟然「甩轆」唔見影,成為議會「關鍵缺席」,事後佢鞠躬道歉兼喺黨內「被檢討」。近月單程證討論焦點落喺新來港人士谷爆醫療系統,楊岳橋同施麗珊就被邀出席電台節目討論,當時楊話家庭團聚好重要,但要平衡整體社會利益;施則要求當局交多啲數據去證明係新移民加重公立醫院負擔。

楊決定赴會 閉門討論

楊岳橋尋日話會應施麗珊邀請同佢哋見面,覺得起碼應該同各方團體有對話,了解大家睇法,但應該會係閉門進行,讓大家開懷討論。至於會唔會委託黨友再動議檢討單程證議案時,佢就話要睇抽唔抽到籤,會再重寫個議案內容讓大家討論。

第一手消息請下載on.cc東網iPhone/iPad/Android/Windows Phone Apps