政情：怕塞良機 陳帆死心不息 翻兜三隧分流
政府上月喺爭議聲中「跪低」，收回向立法會動議嘅「三隧分流」無約束力議案，免得被否決後難再推展。事隔一個月，香港多處仍見到運輸署印有「三隧分流，勿『塞』良機」嘅橫額，似係仍未放棄計劃，據悉運輸及房屋局喺農曆新年前已分別約見各政黨，最快今日率先約見「六人組」，後日就會同民建聯（民記）及公民黨見面，建制派間更傳出當局會有更多承諾以換取直選議員支持。
整埋社交網站貼文 爭取支持
實際上跨黨都支持要推行三隧分流，更甚要求六隧分流，但政府提出嘅套餐式方案，即紅隧、東隧加價以補貼西隧激起市民反彈。而運輸及房屋局局長陳帆推銷方案時，成日話中環及灣仔繞道通車後，加埋分流就可以疏導西隧車龍等，點知繞道通車時搞到一鑊粥，令市民對政府更冇信心。
有政府中人笑稱，從未見過運輸署掛橫額推銷項目，起初聽到時都呆咗，據聞全港掛咗十一條橫額，足證當局仲未放棄，而且局方仲整咗啲社交網站貼文以宣傳計劃，嚟緊會陸續放上網爭取支持。
有建制中人評估當局因應票數再約，自由黨已全數「歸邊」與航運交通界易志明一齊撐政府、經民聯嘅行政會議成員亦會支持，直選議員則可按地區意願投票，如民記支持則差不多夠票。
譚文豪：若原地踏步 傾嚟嘥時間
民記陳恒鑌（Ben）承認當局有約該黨見面，認為如果當局只係舊調重彈，毫冇新意，呢個會面就冇乜誠意可言，早前已反映地區擔憂同睇法，希望當局有新方案或措施，以釋除地區疑慮。公民黨議員譚文豪（Jeremy）亦承認運房局有邀約見面，形容熱廚房煮嘢唔好食，唔會吽一個月變咗好食，如果當局繼續原地踏步，傾嚟都係浪費時間，期望今次真係有新嘢討論。
咁啱得咁蹺，阿Ben係立法會交通事務委員會主席，Jeremy就係副主席，兩人都收到Call約見面，睇嚟當局想先向交通範疇嘅議員埋手。到底政府係「勿失良機」還是「盡失先機」呢？相信好快揭曉。