政情：劉慧卿力數議員 遲大到兼冇準備
守時係一種美德，不過今時今日好多香港人都有遲到習慣，連議員都唔例外。素來守時嘅前立法會議員劉慧卿（卿姐）尋日出席活動時，就大鬧依家啲議員成日遲到，不論係乜嘢立場嘅政黨都有呢個情況，又話佢以前開會時，一夠鐘就一定會催主席開始會議，但依家成日都要等齊人，咁對守時嘅人嚟講太唔公道喎。
叮囑後輩從政要有火
講完唔守時，卿姐再數議員另一罪狀，就係唔睇文件、準備不足，開會時更係只講自己想講嘅嘢，講完就走，完全唔聽其他人講嘢，又冇做好相關議題嘅跟進工作，卿姐批評呢啲係「政客」所為，叮囑後輩千祈唔好咁做。
其實唔止議員，卿姐對依家啲社區主任都有不滿，話佢哋畀人喺網上鬧幾句就驚到「震過貓王」，縮埋唔見影，認為從政要有火。佢又話，雖然已經冇做議員，但仲「老虎都打死三隻」，覺得自己冇錯就一定會出嚟講咁話。