政情：嫌化妝麻煩 鄧家彪紋眉一勞永逸

全程由老婆決定點整

鄧家彪話，以往影宣傳相時都要化妝，但每次淨係畫眉都要搞一大輪，所以好早已經想搵個一勞永逸嘅方法解決，早前佢終於同老婆提起話︰「我想整得靚仔啲。」於是佢老婆就帶咗佢去美容院紋眉喇，而全程都由佢老婆決定點整，花咗大概半個鐘就搞掂晒。

被問到紋眉痛唔痛？鄧家彪就話男人大丈夫唔怕痛嘅，不過遲吓會甩色，如果發現有地方唔同色，就要去補番。佢仲講笑話依家落區日日都要曬太陽，唔知遲吓會唔會流汗流到甩晒色喎。