政情：元朗天價橋疑偷步招標 陳帆博懵議員圍剿

全長五百四十米嘅元朗天價天橋惹來議會同地區反彈，原因係每米造價燒錢三百一十六萬元，不但民主派鬧爆造價驚人，連向來支持政府嘅建制派都有微言，覺得好難硬啃呢個造價，經過同當局討價還價後，路政署終於刊憲招標，外界一般相信，此舉係希望投標者提出更具成本效益嘅建造同創新建議，去回應議員訴求。

不過，今次元朗天價天橋造價問題嘅死結未解，就掀起一個新問題，就係財委會未審批撥款嘅情況下，政府就刊憲招標，引發「偷步招標」嘅疑慮。

朱凱廸：運房局變相逼議員硬食

一直跟進元朗天價天橋問題嘅立法會議員朱凱廸，於社交網站繼續窮追猛打。佢認為今次事件涉及三大問題，第一，元朗天橋重新闖關，政府係咪有出爾反爾之嫌；第二，元朗天橋爭議既涉及造價問題，亦涉及元朗市中心嘅環境及景觀問題；第三，從立法會審議角度出發，佢質疑運房局今次係變本加厲，唔單止「偷步招標」，而且仲要「偷步開標」，選定承建商先問財委會攞錢，變相係逼議員接受，否則「蘇州過後冇艇搭」。佢事先張揚，唔會畀政府快刀斬亂麻，未來幾個月會聯合元朗居民提出改善方案，應對元朗行人擠迫問題。

鄺俊宇質疑「係咪嘈一嘈就平啲」

身兼元朗區議員嘅鄺俊宇亦話，元朗天橋造價高達十七億元，大家都覺得好貴，政府依家二月就招標，希望七月動工，但係事實擺在眼前，就係一日唔喺財委會申請到撥款，一日都開唔到工，唔明白政府點解覺得七月一定開到工。

鄺其後提及，自己多次提及元朗天橋造價問題，質疑係咪議員「嘈一嘈就會平一啲，唔嘈就唔平」，又表明立法會係咪批錢都要睇政府到時有咩功課交，係咪解釋到，揚言會不斷追問陳帆到底︰「問到佢乾，反轉再反轉」。

話時話，元朗天價天橋嘅爭議政治味道甚濃，陳帆若然以為提早招標，造價稍為下跌就可以令議員「收貨」，咁就真係太天真太傻。講到底，陳帆都係要做足政治游說工作，咪以為可以於短時間內博大霧通過到喇！