中環出更：答問大會廖振新閉目疑瞌陣

每次答問會，總會發現有啲官同議員冇乜心機聽，有啲「釣魚」、瞓覺喇，亦有啲就喺度做其他嘢，例如睇手機玩接龍、睇電腦𥄫實股市或者睇文件等等，好似悶到要搵其他嘢嚟打發時間。

聞有份收緊長者綜援 黃國健「嚇醒」

個別議員係有得喺答問會中提問，但係司局長就齋坐，唔使發言，絕大部分局長或部分副局長都會坐喺會議廳內，唔少副局長同政治助理就會坐喺二樓旁聽。會議廳內咁多鏡頭，局長就自然警覺啲，而二樓就比較暗，唔知係咪以為冇人會發現，廖振新同劉富生就合咗眼，疑似瞓咗一陣。

黃國健喺答問會上皺眉閉目好耐。

廖振新（右）喺答問會期間閉目咗好一段時間。（梁家寶攝）

議員都唔例外，身兼行政會議成員嘅立法會議員黃國健之前都試過被發現喺答問會「仰天長瞓」，喺今次答問會講到收緊長者綜援時，佢亦皺眉閉目好耐，但一聽到被指有份批准呢個政策，佢就即刻張開眼，唔通嚇醒咗？

翻查資料，副局長月薪介乎二十一萬七千元至二十五萬元，政治助理月薪介乎八萬四千元至十一萬七千元，「雙料」議員月薪就逾十四萬元，如果咁高人工都開會瞓着，就真係爭唔落啦！

卓妮