中環出更：杜拜過聖誕 葛珮帆首度跳傘
今個聖誕新年好多名人去咗杜拜玩，包括保良局總理鄧宣宏雁（Emily）同埋立法會議員葛珮帆（EQ）。當地氣溫有廿幾度，玩得特別開心。一場來到，少不了去吓超豪華嘅清真寺開眼界，同埋穿越沙漠、享受美食。同家人同遊嘅EQ就抽咗一個朝早時間，完成人生首次跳傘嘅壯舉，大呼感覺超爽超正。
EQ形容首次跳傘覺得既興奮又緊張，當喺一萬三千呎高空跳出飛機嗰一刻，有啲驚，然後急墮約六十秒，塊面被風吹到變晒形。之後降落傘張開，有約五分鐘時間喺空中飛翔漫遊，飽覽杜拜靚景，十分享受咁話。佢之前喺外國玩過多次笨豬跳，都試過預約跳傘，但因天氣太差而取消，今次終於成功咗。
鄧宣宏雁包頭入超豪清真寺
Emily就同老公及囝囝一齊出遊，同行仲有另外兩個好友家庭。Emily喺社交網站上載多張靚相，其中一張係佢同好友Claudia包實個頭，好有趣，原來係參觀被譽為世上最奢華宗教處所嘅阿布扎比謝赫扎耶德清真寺前，按規定，女士們入寺內，頭髮同埋手腳都不能外露，所以佢哋亦都入鄉隨俗，包咗個頭喇！
（先刂）雞全家去加州滑雪迎新年
立法會前議員單仲偕（（先刂）雞）就選擇過白色聖誕。佢同太太去美國搵一對仔，然後全家人去加州滑雪聖地馬麥斯湖（Mammoth Lakes），準備滑足八日雪兼倒數過年。不過身形好Fit嘅（先刂）雞，喺八千呎高嘅雪山上就出現咗少少高山反應，好易喘氣，所以要大力啲吸氣先得喎！
卓妮