中環出更：冰釋前嫌？ 唐唐阿姐又攬又拖手
位於西九文化區嘅戲曲中心尋日開幕，早排八和會館主席汪明荃（阿姐）因為開幕儀式嘅事，同西九管理局主席唐英年隔空駁火。不過隨住時間過去，尋日兩人喺開幕禮上又攬又拖手，仲一齊切燒豬添！唔通兩位已經和好咗？
話說喺今年年初，西九文化區管理局冇邀請香港粵劇界唯一獲承認嘅工會八和會館，統籌同埋參與戲曲中心開幕禮，搞到阿姐嬲爆，批評佢哋唔尊重業界傳統。事隔約十個月，尋日阿姐先主動地同唐英年擁抱。喺影大合照嘅時候，就輪到唐拖住阿姐隻手，然後一齊舉高雙手。兩人全程都笑容滿面，之後仲有笑笑口咁傾偈添。
戲曲中心開幕 阿姐：苦盡甘來
唐英年喺致詞時，就點名多謝八和會館同埋阿姐，話阿姐由表演藝術委員會成立以嚟，去到籌備戲曲中心、大劇院設計等等，都有畀寶貴意見喎。而阿姐喺致詞時就話對戲曲中心開台百感交集，形容為「心裏好似打翻咗五味架」，包括酸、苦、辛、甘、鹹，仲話籌備過程有好多挑戰，覺得幾苦吓，但依家終於苦盡甘來喇。
阿姐又話，自己代表業界爭取興建戲曲中心，喺成功爭取場地後又有其他嘢要處理，形容「好似打咗好多場硬仗，有苦自己知」。仲話業界都想租用新場地，但場租同租用條件都「相當辣」，業界仍要面對平衡開支同做好製作嘅挑戰。聽阿姐咁講法，似乎仲有啲火藥味，唔知唐英年聞唔聞到呢？
卓妮