政情：彭芷君邀蔡毅明 義賣利是袋助留守童
派利是係農曆新年嘅傳統，但對要派利是嘅人嚟講都幾頭痛，事關唔少人都會封幾款唔同「內涵」嘅利是，方便派畀唔同親友。金紫荊女企業家慈善基金主席彭芷君（Gigi）就搵咗本地時裝設計師蔡毅明（Grace）幫手設計一個集多個袋口於一身嘅利是袋，方便將利是分類，嚟緊仲會喺聖誕期間義賣，以扶助廣西嘅留守兒童，而目標係賣到五百個。
加入桂繡 傳承文化
Gigi同Grace話，廣西有約二十萬留守兒童，因為喺當地難以維生，所以佢哋嘅父母大多數都喺外省工作。而廣西侗族嘅婦女大多教育水平偏低，只可以靠向遊客賣桂繡維生，但當地遊客唔多，加上刺一個桂繡需時兩日，令佢哋生活相當困難。故此，Gigi唔止捐助佢哋，仲會畀佢哋喺Grace嘅利是包上加入桂繡，幫助佢哋自力更生，實行「釣勝於魚」咁話。
Gigi嚟緊仲會研究喺杯墊、領呔上加桂繡，咁就可以持續幫助呢班留守兒童同婦女，同時亦令桂繡呢項非物質文化遺產得以傳承。