政情：雙料議員派花紅 泛民助理乜都冇
眨眼間又到年底喇，相信唔少打工仔已經好期待公司出幾多花紅獎金，希望可以過肥年！我哋翻查廿六位立法會及區議會雙料議員嘅區議會開支申報，發現工聯會成眾黨之最，四名雙料議員都有向區議員助理派花紅，由數千元至三糧不等，其中陸頌雄出手最低只派八千多元。不過，有點都好過冇，民主派議員普遍未見有派花紅或出雙糧，民主黨主席、黃大仙區議員胡志偉更喺助理合約內寫明「沒有年終酬金或雙糧」。
根據眾人嘅開支申報，工聯會四名雙料議員包括麥美娟、何啟明、陸頌雄同郭偉強都有派花紅。何啟明有向一位月薪一萬八千元嘅全職助理派二萬二千多元花紅；郭偉強就直接派雙糧，兩名助理月薪分別為一萬四千二百元及一萬三千元；陸頌雄就派最少，只向一名助理派八千二百多元；而麥美娟就酌量派啲花紅。
麥美娟：僱主唔可以側側膊
麥美娟笑言大家冇夾過，唔講佢都唔知咁啱大家都有派，又話佢哋啲助理都係做咗好多年，唔少人由兼職做起，好似佢位助理都做咗近廿年，咁多年都冇同佢計超時補水，所以近年都會酌量派花紅，當係幫補吓。佢直言，唔係僱員唔同你計就可以側側膊，作為僱主喺可以負擔下就應該畀啲福利僱員，但可惜區議會津貼唔太足夠，人工不斷上升之下，迫令部分區議員都無法再派花紅。
部分人專請兼職助理慳錢
其他建制派議員當中，自由黨邵家輝、民建聯（民記）張國鈞及梁志祥都有向區議員助理派雙糧，而民記陳恒鑌就派一萬元獎金。相反民主派就未見有派雙糧或者花紅，兼且普遍人工比較低，部分人仲要專請兼職助理慳錢添！不過，雙料議員仲有立法會津貼，議員可以自由分配點用，所以有部分人可能以立法會資源派花紅畀地區助理都唔定。
其實政黨聘請議員助理都好難，人工福利固然係重要因素。議員經常喺立法會爭取勞工福利，睇嚟應該先幫自己員工爭取福利，否則唔夠人做嘢又點幫普羅打工仔爭取勞工福利呢？