政情：又有橫額印錯名 邊位議員叫「國動」？
議員橫額印錯字並非新鮮事，過往都有立法會議員連自己個名都印錯，而今次就輪到立法會議員劉國勳出事，變成「劉國動」喇。而佢仲話，現實中真係有人咁樣叫錯佢喎。
現實中真係有人讀錯
劉接受查詢時話，自己喺全港都有橫額位掛橫額，有啲會交畀黨內地區支部使用，而佢都唔知今次出錯橫額嘅實際位置，相信今次只係手民之誤，唔會怪責任何人，不過就已要求改正。佢又話，本身諗過喺寫錯嘅「動」字中「重」嘅下面加四點，但加咗就變錯別字，所以都係貼上正字，咁樣亦唔使換過成條橫額造成浪費。佢更自爆起初服務社區時真係有人讀錯佢個名為「國動」，不過隨住多年地區工作，同埋近年有唔少韓星個名都有「勳」字，已經好少人叫錯喇。
「國勳」呢個名容易令人讀錯，但就算讀啱音都可能會有誤會，事關佢有朋友叫佢做「阿勳」，與女仔名「阿芬」同音，所以佢話會以「功勳」、「勳章」等自我介紹，而佢服務社會嘅心都係因為呢個名而起咁話喎。